قصة الفوز للمنتخب العراقي

طبعا ما اعرف يحتاج اكولكم مبروك لو كافي تبريكات ؟؟, لان ما ضل احد ما كال مبروك الكم وللعراق فوز منتخبنا الوطني
كل واحد عبر بطريقته الخاصه بفرحه بفوز العراق ... ناس ضربت طلقات ناس ضربت صعادات ناس ضربت اوتي
وناس ذبحت طليان وناس ذبحت بشر وشمرتهم بالشارع ..
وايضا تباينت ردود الافعال العربية حول هذا الفوز ...
الامارات العربية الشقيقة ترسل طائرة خاصة وتحتفل وتكرم المنتخب وتطلق حرية الفرح للعراقيين
في الوقت الذي شاركنا الاردنيون افرحنا من خلال قوات التدخل السريع و قوات حفظ النظام وقاموا مشكورين بالتصفيق الحار على وجوه و و( علابيات ) العراقيين المحتفلين
وقاموا كما سمعتم بوضعهم في صناديق السيارات واخذهم الى جهات مجهولة وهم يرتدون الملابس السوداء ويركبون سيارات سوداء وقلوبهم سوداء كما هو حال وجوههم
وانا اجزم ولا اقسم لو ان المحتفلين يحملون جوازات سفر امريكية او اسرائيلية لما عاملوهم هكذا ...
يابة اذا حكومتنا محد محترمها شلون نريدهم يحترمونا ...هسة خلي احجي بالعامي لان الفصحى ضوجتني .. عبالك دا امثل فلم الرسالة .. اريد
احجيلكم على الي صار بهذا اليوم التاريخي
طبعا اصدقائي
هواية قروا براسي حتى اطلع وياهم .. بس اني رفضت لان جنت متوقع حتصير هيجي هوسة , كلت اني شكو مورط نفسي
اكعد بالبيت العب ( تومب رايدر الجديدة ) اشرفلي ..
اني ودا العب جان اصدقائي يخابروني من نص الهوسة مال الاحتفالات الي صارت بشارع الجاردنز وشارع السيرك , كلولي لك ايجنت مكانك خالي ترة الونسة للستار
دبرلك علم والحكنا ...
كلتلهم شنو ماكو شرطة .. محد اندك بيكم ؟؟
كلولي لا ماكو شي وفد ونسة موووووش تبيعية .. اني كلت وية روحي يابة شكو لعد كاعد محدق وحدك دروح طربك وية الهوسة
فلبست شورت اصفر فسفوري و فانيلة كت بنفسجي وحذاء روغان ماروني وجواريب مقلمة .. كلت لازم البس شي انيق يليق بمستوى الحدث
وانطلقت ساعة 6 العصر ... وكفت براس الشارع انتظر تكسي حتى اروح للكاردنز
طبعا تكسيات بـح ... فيش تكاسي
وهنا بدت الضوجة و الوغف يتغلغل في اعماقي ... الى ان اجاني ابو تكسي شريف ( او هكذا ضننت )
طبك يمي .. اني هم ما كلتله تروح للكاردنز لو لا .. كبل انقضيت عالباب كالاسد وكمزت بالسيارة .. ما مصدك تكسي يوكفلي
السايق ابتسم بوجهي ... كلي وين رايح
اني هم ابتسمت كلتله للجاردنز شارع السيرك .. جان ابتسامته تكبر وكلي تكرم عينك
وانطلق ..
التوغيفة مالتي نزلت .. ورجعتلي الفرحة .. بس مشينا شوية شفت السايق ما مشغل عداد
كلت الله .. انة اخو فادي ... راح يقفص علية
خلي افشله و افاجئه واكوله ليش ما مشغل عداد ...
وفعلا استجمعت قوتي وكلتله بصريح العبارة و بصوت خشن هز ارجاء شارع المدينة المنورة هز ..
كلتله العفو اخوية بس يمكن نسيت تشغل العداد
كلي والله العداد عاطل ...
طبعا اهل التكسيات عدهم الحلفان بالله عادة وهواية مفضلة .. حتى اذا الموضوع ما يحتاج حلفان
كلتله زين جااااا شلووون ؟؟؟
شكد راح انطيك ؟؟
كلي والله بكيفك شكد تريد تدفع ادفع ...
كلت اي زين .. هي كروتها 750 فلس .. بس لان اليوم فرحة جبيرة و المنتخب ماخذ الكاس خلي انطيه دينار لابو التكسي
كلتله دينار زين ؟؟؟؟
اشو هذا انكلب فاندام ... والنسر الي على جبينه طار
وكلي شوووو دينار , عم بشحت منك انا
هاي اجرتها ليرتين ...
طبعا يسمون الدينار الاردني ليرة ... يدلعوه
كلتله لا هواية ما ادفع ليرتين ... جان يطبك على صفحة
وباوع علية وكاااااااال
مع احترامي الك ... بس انتوا العراقيين مابتقدروا
والله ( هم حلف طبعا ) .. لو كنت عارف انك عراقي ما كنت وكفت لك
اتفضل انزل ..
جاااااااااااااااا شني السالفة بوية .. اشو هذا رزلني , زين شسوي ؟؟ اتعارك ؟؟
لا طبعا .. لان اني عراقي وهذا مواطن .. زين اركض عالشرطة واشتكي ؟؟
نزلت من السيارة واني مذهوووول ... لان اترزلت من ابو تكسي , لمجرد انه رفضت اخليه يقفص علية
كلت ليش هيج ياربي .. هاي تليها ابو تكسي يكولي لو ادري بيك عراقي مجان وكفتلك
وبهاللحظة اتذكرت مسلة حمورابي .. واثار بابل و الزقورة وصلاح الدين الايوبي و الكول مال يونس محمود
..
جان افز .. كلت يلة طبه مرض خلي يولي , اليوم يوم فرح واني طالع فرحان من البيت خلي اروح اتونس واصفك واشتري علم بالطريق
وبطلت ما اخذت تكسي , كلت وية روحي هي كلها كم خطوه
دخذها مشي , نزل كرشك شوية
..
وفعلا انطلقت كحفاً على الاقدام واتفرج على العراقيين شايلين الاعلام و طالعين من سياراتهم والهورنات
وكل ما تفوت سيارة رقمها سعودية العراقيين يكلبوها نجف بالهوسات والتصفير
فد منظر راااائع وحلو , طبعا السعوديين يضحكون وشايلين علمهم وينزلون يهوسون وية العراقيين كانه همة الي فايزين مو احنا ..
مدري من فشلتهم مدري صدك يحبونا الله اعلم
المهم مشيت وصلت لدوار الواحة لكيت واحد ديبيع اعلام عراقية .. صغار و كبار , اعلام عادية و ام العودة وام الكبوس
كيفت كلت اييييي واخيرا .. راح اشتري علم بلدي حتى اهوس وية الناس بالشارع ..
رحت على ابو المحل , جان يبتسم بوجهي ,
بهاللحظة اتذكرت ابو التكسي , ما اعرف ليش
كلتله يعطيك العافية
كلي الله يعافيك ..
كلتله عمو اريد علم ..
كلي اي حجم تريد ,
صفنت عالاعلام .. وشفت واحد حلو مرتب وبيه عودة تخبل ..
بديت اتخيل نفسي واكف فوك قمارة سيارة وبيدي العلم يرفرف و الناس تهتف والمعجبات يشمرون علية ورد
والنسوان يهلهلون .. وصديقي ديشلع بشعره لان فعصت قمارة سيارته
ونزلت الدمعة من عيني ...
وكلتله لابو المحل .. هذا العلم الجبير ابو العودة ابيش
ابتسم و كلي ب 15 دينار ... كلتله هوة والنجوم ؟؟
كلي اي
كلت لا هذا غالي .. صح العلم عزيز .. بس ترة ( فيش مصاري يازلمي ) ..
كلتله اكو سعر اقل .. كلي اي في
اشرلي على واحد اصغر منه .. هم حلو ومرتب كلتله جااااا هذا ابيييييش ؟؟
كلي 6 دنانير ...
هم كلت وية روحي ( فيش مصاري يازلمي )
اخير شي صفيت على هذا العلم الصغير الورق مطبوع من جهة وحدة و الجهة الثانية كلشي ماكو ..
يابة هذا ابيش .. كلي هذا ب 3 دنانير ..
اشتريته وانطلقت اركض كالغزال بس اريد الحك .. الساعة صارت 7 ونص
وصلت لنص الكاردنز و الدنيا مكلوبة عراقيين ,واكفين عالارصفة يصفكون وشايلين اعلام
والسيارات رايحة جاية بنات و ولد و زعاطيط ونسوان ورياجيل
كلها فرحانة وتهتف و تغني .. واني مشغل الاغنية مال فرحة العراق بالموبايل, جانت توها نازله وفرحان بيها
شعور لا يوصف من الفرح ,
اتذكرت ايام بغداد من جنا نفتر بالاحتفالات بشارع العرصات و الربيعي و الحارثية والناس فرحانة ومرتاحة
وزادت فرحتي ونسيت المغثة مال ابو التكسي ..
وصلت لموقع التجمع الي صاير بشارع السيرك يسموه شارع شاكر نسبة الى اسواق شاكر
جان المنظر يخووووف , العراقيين بأعداد هاااااااااااااااائلة .. والهوسة والهرجة والصياح مو
طبيعية ..
وشفت ولد شايل علم جبير و واكف فوك قمارة سيارة ... اني ضجت
لان اني جان عاجبني اسوي هيج , بس لا عندي علم جبير ولا عندي سيارة واصدقائي ماكو ما اعرف وين ولوا
المهم وكفت بنص الهوسة شايل العلم مالتي الي مشتريه ب 3 دنااااانير وفرحان وأرفرف بيه ... جان تجي علية بنية عراقية كلش حلوة كايده جاهل
كلتلي مرحبا عيني .. كلتلها هلا هلا
اني عبالي معجبة وهذا الجاهل اخوها الصغير , كلت وية روحي لك ايييييييييي بدة الشغل
اشو هاي كلتي اكولك عفية هذا ابني ( اول بوري , طلع ابنها مو اخوها )
ديبجي يريد علم وما اعرف منين اجيبله , ميخالف تنطيني العلم مالتك وانطيك فلوسه
( البوري الثاني .. راح العلم)
كلتلها يمعووووووووودة , صدك جذب اني اصيرله علم لابنج
اتفضلي ..
خطية فرحت واخذت العلم مني وراحت
وراها ما شفتها بعد .. اعتقد باعته واخذت الفلوس
المهم ..
فدوة .. مو مشكلة , طبعا اني مقهور ع ال 3 دنانير مو عالعلم
ضليت واكف اتفرج عالبنات ( والولد طبعا ) , واصفك وحدي واصور بالموبايل
واصدقائي ما الهم ذكر , لا شفتهم ولا احد خابرني منهم
كلت يلة طبهم مرض شسوي بيهم خليني وحدي متونس ... ورة شوية خابر صديقي , كلي انت وين كلتله بالكاردنز انتوا وين
كلي احنا بالرابية ومحصورين بين السيارات مدا نكدر نطلع لان هوسة خرافية خصوصا يم كاسم ابو القص ( قاسم ابو الكص )
كلتله زين لعد اني راح اضل اتفرج عالهوسة فد شوية وارجع ...
وسديت التليفون وبقيت اتفرج
هناااااااااااااااااااااااااااااااااااك .. ما اشوف الا سيارات شرطة وسيارات مدنية بيها شباب مدنيين
نزلوا نزلة رجل واحد
..
وبيدهم دونكيات , طبعا الدونكيات ترة عبارة عن عصي معدنية يشيلوها الشرطة مو عبالكم دونكيات يعني جمع زمال بالانكليزي
المهم .. نزلوا الشرطة ودك كتل بالشباب , ودفرات وسحل واخذوا الاعلام منهم , حتى البنات ما سلموا من ايدهم
وضلوا يركضون ورة العالم وصار طشار العراقيين ماله والي ... كلها كامت تتطافر من بدة الكتل و السحل
طبعا اني شفتها هيج صارت , صحت دااااااااااااااااااااااااااااااااااايزر .. اطفر
وشلتها بركضة حالي حال الشباب بس اريد اخلص لا اروح انشال وية الي انشالوا
ركضت و عفت الهوسة وراية .. نسوان ورياجيل يتراكضون حتى الي كاعد بسيارته نزلوه
المهم خلصت من الهوسة باعجوبة . وصلت لشارع الجاردنز للتقاطع مال السيرك
شفت الوضع زين والعراقيين ديهوسون وفرحانين ... والوضع طبيعي جدا
واني على حس الطبل خفن يارجلية .. ليش اجوز ؟؟ ابد
هم وكفت وياهم اتفرج واصفك واكمز
وبعد برهة ( حلوة مال برهة سجلوها يمكم )
جتي سيارات جمسي سودة من فوك ليجوة .. وانفتحت البيبان
ونزلوا منها ملائكة ,لابسين اسود فسود
عبالي جيش المهدي وصلوا لعمان .. كل واحد شايل بيده زمال هالكبره ( دونكي ) وهم اشتغل المطارد والركض والدونكيات والسحل
هم زين نزلوا بعيد عني ,
اني هم شغلت التربو مال كراعيني واطلقت لها العنان وليييييييييييييييييييييييييييييخ
اركض وية الناس , باوعت على صفحتي اليمنة لكيت واحد كاتل روحه من الركض
باوع عليه وكلي ... هووووووووووووووة حصل ايه
هوووووووووووووة في ايه
طلع الاخ مصري واكف ديتفرج ومصفوك بعجل ديناميكي , كلتله اركض اركض
هذولة قوات مكافحة الشغب ...
هوة سمع بيها مكفاحة شغب اشو هذا صار كدامي ب 200 متر , يمكن هسة هوة بالقاهرة على الركض مالته
ما اطول عليكم السالفة ..
بس صرت بعيد , كعدت بالكاع بس اريد اخذ نفس
وهم صفنت , اتذكرت ابو التكسي , والبنية الي اخذت العلم مالتي , والشرطة الي نزلوا علينا , والكول مال يونس
جان اكوم على حيلي ورجعت كحف مثل ما اجيت
بلا تكسي بلا بطيخ
ولحد هذي اللحظة مدا مدا استوعب الفكرة , وكلمة ليش مدا تروح من بالي
ليش هذولة الشباب العراقيين ولد الخير , انكسرت فرحتهم
فوك غربتهم فوك هجولتهم
حتى الفرح حسرة عليهم ليش هيجي ينهان العراقي ابلد عربي ...
ويظل السؤال
ليييييييييييييييييييييييييييييييش ؟؟؟؟؟؟؟؟؟؟؟؟؟

تحياتي